Sígild sönglög 2

Sígild sönglög 1-2 – Textar, nótur, hljómar, grip
Sígild sönglög bækurnar eru safnrit með nótnalaglínur sérvaldrar tónlistar í anda svonefndra „rútubílasöngva“ og vasasöngbóka. Í hvorri bók eru laglínur 100 íslenskra og erlendra sönglaga fyrir einstaklings- eða samsöng og hljóðfæraleik á píanó, gítar, harmoniku eða önnur hljóðfæri. Bókstafahljómar eru yfir laginu, oftast í samræmi við frumheimild. Griptöflur fyrir gítar-, píanó- og harmoniku eru innan á bókarkápum. Í flestum tilfellum fylgja öll textaerindi laginu og fyrsta erindið aukalega undir nótum. Við mörg laganna er getið um uppruna svo sem erlent heiti lags og tilurðarsögu ásamt heimildatilvísunum. Heimildaskrá er 3 bls. Til að auðvelda leit að efni inniheldur efnisyfirlit beggja bóka heiti laga, upphöf, viðkvæði og atriðisorð í báðum bókum.
Lagaval 1. heftis er miðað við fyrri hluta 20. aldar og þaðan af eldra efni ásamt örfáum yngri viðbótum – frá þjóðlögum til dægurlaga. Í 2. hefti er áhersla á sönglög áranna 1930-1960 með einstaka eldri og yngri viðbótum. Að hætti „rútubílasöngva“ er textaefnið fjölþætt svo sem ættjarðarljóð, amorsvísur, barnagælur, ferðavísur, drykkjuvísur og jólakvæði.
Samval og framsetning: Gylfi Garðarsson
Nótuútgáfan – 1995/../2004 – ISBN 9979600918 – A5 – 138 bls.    (nánar á Leitir.is)